As jy ’n voornemende of huidige voorgraadse student met Suid-Afrikaanse burgerskap of permanente verblyfreg is, kan jy om US-befondsing aansoek doen. As jy ’n ingeskrewe voorgraadse US-student is, kan jy die aanlyn aansoekvorm met jou agtsyfer-studentenommer oopmaak. As jy ’n voornemende student is, moet jy jou Suid-Afrikaanse ID-nommer of jou paspoortnommer gebruik om op die aansoekportaal aan te teken.

Jy kom in aanmerking as julle huishouding se bruto jaarlikse inkomste minder as R350 000 is. As jy gestremdhede het, is die afsnypunt vir bruto jaarlikse inkomste R600 000.

As jy NSFAS-fondse ontvang, doen asseblief ook vir US-befondsing aansoek, ingeval NSFAS jou befondsing staak. As dit gebeur, word jy op ons databasis gederegistreer as NSFAS-begunstigde en kom jy in aanmerking vir aanvul- of tekortbefondsing deur die Universiteit.

BELANGRIK Die Universiteit se fondse is beperk. Die feit dat jy om befondsing aansoek gedoen het, waarborg nie dat jy dit sal kry nie.

Die US Jaarboekdeel Beurse en Lenings sluit beurse en lenings in wat bestuur word deur die US sowel as deur maatskappye, trusts en die staat. Die inligting is volgens fakulteit gerangskik, maar ons stel voor dat jy kyk na álle moontlikhede in Afdeling 1 (studiebeurse by die meeste fakulteite) en Afdeling 3 (Fakulteit Natuurwetenskappe), ongeag wat jou studieprogram is. Dit is omdat party beurse vir studies by meer as een fakulteit aangebied word, maar dan mag hulle net onder Natuurwetenskappe gelys word. Let asseblief op die sluitingsdatum en aansoekproses vir elke spesifieke beurs; dit verskil.

As daar “Aansoeke: SUFO” by ’n beurs staan, beteken dit jy moet via die aanlyn portaal vir US-Befondsingsgeleenthede (SUFO) aansoek doen. Ons beursbeamptes kies en/of benoem kandidate op grond van die maatstawwe wat die spesifieke beurs stel en/of die befondser of beursskenker se voorwaardes en aanwysings.

Die aansoekproses geskied aanlyn. Ons aanvaar of oorweeg geen aansoeke per e-pos nie.

Let asseblief op dat die aanlyn aansoekportaal geen inligting stoor wat jy verskaf nie, totdat jy uitkom by die stap waarin jy stawende dokumente oplaai (afdeling 8). As jy die aansoekvorm toemaak voordat jy daar uitkom (d.w.s. voordat jy afdeling 7 afgehandel het), moet jy van voor af met die proses begin.

Die beste is om jou aansoek in een sessie af te handel. Ons beveel aan dat jy dit doen terwyl daar nog oorgenoeg tyd voor die sluitingsdatum is. Onthou asseblief om gereeld in jou @sun- sowel as jou persoonlike e-posbus te kyk vir terugvoer oor jou SUFO-aansoek. Gaan ook deur jou gemorspos-vouer.

BELANGRIK Jy kan óf vir US-befondsingsgeleenthede aansoek doen óf vir ’n eksterne studielening. ’n Eksterne maatskappy, Student Hero, verwerk die aansoeke om studentelenings. Die Universiteit Stellenbosch bestuur of administreer dit nie.

Ons raai jou aan om alle stawende dokumente wat vereis word (ook afskrifte van sertifikate, waar nodig), gereed te kry en byderhand te hê voordat jy die aanlyn aansoekproses begin. Dit sal jou tyd spaar terwyl jy die proses volg. Stoor jou dokumente in ’n voulêer met ’n maklike naam, soos “SUFO-aansoek”, sodat jy dit maklik kan opspoor.

Jy het die volgende inligting en stawende dokumente nodig om ’n aansoek om befondsing af te handel:

_formele indiensnemin jongste betaalstrokie (nie ouer as 3 maande nie) of ’n ITA34-dokument
_informele indiensneming beëdigde verklaring wat die maandelikse inkomste noem, asook die bron van inkomste (bv. groenteverkoper, huiswerker, vryskutwerker)
_selfindiensneming bankstate wat maandelikse inkomste duidelik aantoon (nie ouer as 3 maande nie) of ’n ITA34-dokument
_werkloos beëdigde verklaring (wat noem sedert watter datum werkloos is) of uitdiensstellingsbrief of WVF-strokie (van die Werkloosheidsversekeringsfonds)

Klik op die oortjie Soorte Befondsing en dan op die blok vir US-beurse vanaf eksterne befondsers. Daar is ’n lys met tien beurse, waarvan die besonderhede in die tabel hier onder verskyn.

Die US Jaarboekdeel Beurse en Lenings noem 11 gesinsbeurse. Die besonderhede is in die tabel hier onder.

Die aanlyn aansoekvorm begelei jou stap vir stap met duidelike instruksies deur die proses. Dit behoort so 15 minute te neem om die vorm in te vul.

POPI-wet Jy moet toestemming gee, soos die Wet op die Beskerming van Persoonlike Inligting (Eng. POPIA) vereis, dat ons alle dokumentasie (soos bewys van inkomste, ID, sertifikate en bankstate) deur ’n eksterne diensverskaffer mag laat nagaan voordat ons jou aansoek verder hanteer.

Stawende dokumente Maak seker dat jy die regte dokumente oplaai wanneer die stelsel dit vra.

Nadat jy jou aansoek ingedien het, sal jy ’n geoutomatiseerde e pos kry wat bevestig dat ons jou aansoek ontvang het.

As jou aansoek slaag en ’n beurs word aan jou toegeken, sal ons jou daarvan inlig. Daarmee saam gee ons jou die besonderhede van die beurs wat jy ontvang het, asook wat jy volgende moet doen om te verseker dat die toekenning sonder haakplek deurgaan.

Let op: As jy teen die einde van die jaar waarvoor jy befondsing gevra het, nog niks oor ’n beurstoekenning gehoor het nie, kan jy aanvaar dat jou aansoek nie geslaag het nie.

Byvoorbeeld: As jy in 2025 om befondsing vir 2026 aansoek gedoen het en jy het teen die einde van 2026 nog niks gehoor nie, het jou aansoek waarskynlik nie geslaag nie..

As jy enige tegniese probleme teëkom met die invul van jou aansoek, registreer asseblief ’n versoek op die US Dienstoonbank se portaal: Teken aan op die portaal, kies Student Finances (studentefinansiering) > Undergraduate Bursaries (voorgraadse beurse) > SU Funding Opportunities (SUFO = US-befondsingsgeleenthede). Onthou om jou US-studentenommer of US-aansoeknommer by jou beskrywing in te sluit voordat jy jou navraag stuur.

“Tegniese probleme” is byvoorbeeld as jy nie regkom om ondersteunende dokumente op te laai nie, as knoppies nie werk nie, as jy sukkel om weer aan te teken om jou aansoek af te handel, of as jy enige foutboodskap in die loop van die aanlyn aansoekproses kry.

Andersins kan jy US Kliëntediens skakel, by 021 808 9111.

Kantoorure Maandae tot Vrydae, 08:30 tot 16:30

Voordat jy die aanlyn aansoekvorm oopmaak, kom ons som net op:

1. Jy het elke afdeling hierbo gelees om te sorg dat jy die regte, akkurate inligting verskaf.
2. Die lêernaam van elke ondersteunende dokument begin met jou US-studentenommer of aansoeknommer en is in pdf-formaat op jou rekenaar gestoor in ’n voulêer wat duidelik gemerk is (“SUFO-aansoek”).
3. Jy het minstens 15 minute in jou dagprogram opsy gesit om die aansoekvorm in te vul.

Maak asseblief seker dat jy die regte befondsingsopsie op die aansoekvorm kies: “US-befondsingsgeleenthede”. (Die opsie vir eksterne studentelenings word nie deur die US bestuur nie. As jy dit kies, neem dit jou na ’n eksterne webblad.)