Die merietebeurs vir voorgraadse studente aan die Universiteit Stellenbosch word uitsluitlik op grond van skolastiese of akademiese prestasie toegeken en daar is geen aansoekproses vir hierdie merietetoekenning nie.

Die beurs word aan die einde van April toegeken en op die Mei-studentegeldestaat weerspieël. Studente word skriftelik van hulle keuring in kennis gestel. Hierdie kommunikasie sluit belangrike besonderhede oor die toekenningsvoorwaardes in.

Merietebeursriglyne

Wanneer word gelde uitbetaal?

Aangesien die merietetoekenning as ’n korting op die studenterekening geadministreer word, word geen kontantterugbetalings uitbetaal nie. Die korting sal op die studentegelderekening en die Junie-staat weerspieël word.

Die enigste uitsondering op gelde wat uitbetaal word, is as die studenterekening reeds ten volle betaal is. In hierdie geval moet die student die SVBL skriftelik kontak om ’n bankvorm aan te vra en bewys van betaling van ’n ouer/voog te lewer dat die rekening ten volle betaal is. In hierdie geval sal die korting daarna as ’n krediet weerspieël word en gelde sal vanaf Augustus uitbetaal word.

Waarom kan die Merietebeurs gekanselleer of verminder word?

Kansellasie  Indien ’n eerstejaar- of senior voorgraadse student ’n volkostebeurs ontvang, of ’n kombinasie van beurse wat gelykstaande is aan die waarde van ’n volkostebeurs, sal die merietebeurskorting gekanselleer word. Die merietetoekenning sal ook gekanselleer word indien ’n student hulle studies gedurende die akademiese jaar staak.

Vermindering  Indien ’n eerstejaar- of senior voorgraadse student ’n gedeeltelike beurs bykomend tot hulle merietetoekenning ontvang, kan die merietebeurs waar van toepassing vir die onderstaande volkostebeursuitgawes aangewend word.

'n Volkostebeurs* kan ’n enkele beurs of ’n kombinasie van beurse wees wat al die volgende uitgawes dek:

• Volle klasgelde.
• Handboeke ter waarde van R5 200 of meer.
• Huidige verblyfkoste vir ’n akademiese jaar van tien (10) maande waar die maksimum bedrag gelykstaande is aan ’n enkelkamer in ’n universiteitskoshuis.
• Etes ter waarde van R15 000 of meer.
• Vervoer ter waarde van R7 500 of meer indien jy by die huis woon.

*Die waarde van ’n volkostebeurs en toelae stem ooreen met die nuwe DHOO-beurse wat jaarliks deur die Nasionale Finansiële Hulpskema vir Studente (NSFAS) voorgeskryf word.

Die SVBL sal die merietebeurs sonder vooraf kennisgewing kanselleer of verminder indien daar aan enige van die bogenoemde kriteria voldoen word..

BELANGRIKE KENNISGEWING

Die student dra die onus om teen Junie van die akademiese jaar waarin hulle op ’n merietebeurs geregtig is, seker te maak dat die beursbedrag wel op hulle studentegelderekening verskyn. Ontvangers wat versuim om die SVBL teen die einde van Augustus skriftelik by sunfinaid@sun.ac.za in kennis te stel dat die beurs nie op hulle studenterekening verskyn nie, verloor hulle aanspraak op ’n merietebeurs. Dui asseblief jou studentenommer in die onderwerpreël aan, bv.SU# / Merietebeurs – verskyn nie op studentegelderekening nie’.